Market Insight：比亞迪有排冇運行

通街都話A股平，但就日日有唔少賓架趕住去換眼鏡，到底隊到乜位，相信是最多股民所關心。客觀條件，A股估值較過去十年兩次熊市低，刻下可能離真正低位不遠，尤其貨幣政策有充裕的放寬空間。而十八大盛傳下月中展開，憧憬中央有提振經濟措施公布，A股低位較大機會在十月中之前或後出現。

滬綜見千九點唔奇

另外，前日人行出動史上最大規模嘅2,900億人仔的逆回購，可惜人民幣拆息依然不為所動，在七個月高位徘徊，有芬佬話，即使人行逆回購不絕，過去兩星期內地水緊情況變本加厲，主要是粉飾季結，銀行資金供應變得緊張，過埋呢兩日應有改善，按此推斷，最壞打算每日插1至2%，滬綜指都未必輕易到達淡友大摩的目標1,850點，試穿2,000點，或者掂一掂1,900點機會卻是存在。

放大圖片

放大圖片

假如有分析員話揸隻股票，要再跌97%的話，你會點做？這魚缸熱話，緣於曾經將比亞迪（01211）捧到天咁高的里昂分析員Scott Laprise，因為電動車神話不再，來個大義滅親，出報告給予比亞迪0.41元目標價，僅及報告面世時，14.7元的3%。突然無風起浪，唔少人紛紛打探點解呢位星級分析員咁做。

如果細心睇過大行的研究報告，通常最後一版會列出該行分析員，睇好、睇淡或者中性評級的目標股份比例。過往好景時，比例通常八成唱好，各一成唱淡及中性，不過即使淡市，睇好往往都有七成以上。

投行報告互鬥出位

投資銀行各項業務中，研究部本身無賺錢能力，請大班高薪賓架番嚟寫報告，長期報喜不報憂，講穿了係希望刺激芬佬入市意欲，畀公司sales team（銷售團隊）做多啲生意外。另一個不成文約定，是分析員與上市公司建立互信兼友好的關係，為未來融資或者購併生意鋪路。

隨着股市成交愈玩愈縮，傳統互惠基金生意有限，做長短倉（long & short）的對沖基金及高頻交易，漸漸變成投行新爭奪佣金戰線之一。亦因此，討好做淡的芬佬成為分析員嘅新任務，佢哋漸漸唔怕得罪公司（尤其部分預咗無生意着落的公司），行動也愈來愈出位，有些甚至咬住唔放，人人睇十蚊，佢唱五蚊，人睇五蚊時，佢睇五毫，總之走到最前。其實道理好簡單，一旦遇上知音，口淡淡芬佬一定睇佢報告，搵佢傾傾，看是否有真知灼見，分析員及其報告吸引更多眼球，也乘機幫公司做多單沽空生意。

比亞迪會唔會見0.41元？主觀睇，古勝覺得機會唔大，始終股神巴菲特的金漆招牌，點都值7至8元，可是從基本因素，在下認為比亞迪太貴，電動車距離普及，看來十劃至多得兩撇。幾百億市值嘅比亞迪，上半年賺得1,627萬元人民幣，實在太難睇，即使街外預期下半年谷底反彈，全年賺6億至7億元人民幣，同單位數PE嘅汽車股，仲係無得比。

里昂份報告出咗街之後，比亞迪的沽空股數由周一的34.5萬，倍增至過去兩日分別189萬及418萬股，證明Scott Laprise叫座力唔弱，淡友在13.5至15元依然願意囤起重兵，只怕明年三月業績前，向10元樓下進發，可能性遠遠大於重返早前16至17元高位。

金礦股趁整固入貨

近期金價回軟，而金礦股亦都進行整固，昨日招金礦業（01818）、紫金礦業（02899）、靈寶黃金（03330）跌幅介乎1至4%，而SPDR金ETF（02840）則跌0.38%。不過，古勝認為，喺各國政府鬥印銀紙之下，金價難以大回，加上技術上金價已經扭轉咗過去六個月嘅弱勢，相信短期整固可再試高位，年底前金價有望試衝每安士1,870美元區域，可趁短線調整留意低吸相關ETF或股票嘅機會，金礦股中招金仍為首選。

古勝