呢排Prof. J成日都番祖國了解國情，深切體會到內地嘅飲酒文化何其濃厚。酒過三巡，互相盡訴心中情，又真係會飲出真友誼。每次飯局，左鄰右里差唔多每枱至少都有兩、三支大啤。睇嚟啤酒都好快要列入必需品行列。
香港上市嘅啤酒股一隻手都數得晒，但除此之外，有啲大企業其實都有染指啤酒生意，當中就有華潤創業（00291）。佢旗下隻「雪花Snow」啤酒第二季發力，由虧轉盈，從第一季虧損3,300萬元轉至第二季獲利4.08億元，成為公司四大業務中表現最好一環。
睇嚟啤酒業務將會成為公司明日之星，事關暫時「雪花Snow」只佔市場22%，四大企業加埋都未夠六成。若果華創繼續宣傳推廣「雪花Snow」，相信可提升品牌形象同顧客嘅忠誠度，搶佔更高嘅巿場佔有率。
第二季盈利爆咗上嚟，咁第三季又會唔會乘勝追擊呢？Prof. J就覺得第三季會更加旺。事關今個夏天真係熱咗好耐，冰凍嘅「番鬼佬涼茶」確實係最受歡迎嘅消暑良方。公司要有盈利，單靠市場需求並唔足夠，同時還要控制成本，而今年下半年大麥價格較低，相信將會係華創啤酒業務盈利增長動力同毛利率擴張嘅關鍵一年。再加上華創本身擁有自家超市零售網，在銷售渠道方面亦佔有優勢。
睇牌面，華創有本錢同人fight過，不過，眾所周知打造品牌嘅市場策略一直都係「燒錢」嘅舉動，要畀啲時間去睇成效。暫時股價去番近期高位，值得留意能否大成交破頂，還是高位整固。繼續追蹤，出發！
香港大學電子金融服務榮譽助理教授 徐燦傑