美國大選在即，人人都希望選個可以帶領美國經濟走出谷底嘅總統，所以經濟方面嘅政綱自然係今次選情勝負關鍵，奧巴馬同羅姆尼嘅金融及商界支持者齊齊晒冷，唔知對佢哋嘅選情有冇幫助呢？
絲絲一望奧巴馬張粉絲名單，就覺得人才濟濟，幾乎全部都係講得出名，有頭有面嘅國際知名商家，包括有微軟創辦人蓋茨、Facebook行政總裁朱克伯格、雅虎行政總裁邁耶（Marissa Mayer）同埋Google前執行董事長施密特（Eric Schmidt）。就連股神巴菲特都係奧巴馬嘅擁躉，由此可見，奧巴馬都深受生意人嘅愛戴。
奧巴馬張名單咁有睇頭，佢嘅競爭對手羅姆尼張list都唔輸蝕o架，JP Morgan Chase嘅副主席James B. Lee, Jr.、太陽電腦行政總裁麥尼里〈Scott McNealy〉、黑石集團主席施瓦茨曼〈Stephen Schwarzman〉都係羅姆尼嘅fans。除咗佢哋，仲有超過400個經濟學家，包括諾貝爾得獎者Gary Becker同Robert Mundell都支持羅姆尼嗰套，仲話佢個經濟方案真係好勇敢﹗