上市公司出現高層人事變動，特別係董事成員，按《上市規則》必須通報，但若然唔係董事，上市公司就自己衡量係咪需要向投資者披露。好似伊泰煤炭（03948）尋日出咗一份公告話要更換總工程師，由張明亮代替劉繼明，雖然唔係「首席咩咩官」，辭任者同接任者都唔係董事，但公司都照樣作出披露，可見總工程師喺一間煤炭公司入面嘅地位都好有分量。
投資者好多時諗起嘅上市公司高層，除咗主席董事之外，通常都係首席執行官CEO、財務總監CFO、營運總裁COO呢類，但查實一間上市公司邊個職位重要，有時真係好睇係咩嘢行業，今次伊泰可以畀大家做例子，喺煤炭行業嘅總工程師其實都好重要o架！
依家嘅上市公司監管對披露要求好高，何況伊泰煤炭作為一隻半新股，做多啲披露都好嘅，咁樣投資者信心都會高啲啦。