中環甲級寫字樓長期供不應求，大面積兼連續幾層就更難搵。不過，渣打（02888）就成功租咗4.8萬平方呎嘅新落成寫字樓，地點仲要係喺商業中心區嘅交易廣場，秘訣無他嘅，最緊要咪係快手囉。
渣打租用嘅寫字樓，係由中環富臨閣（The Forum）重建而成。業主置地公司喺舊年12月宣布將物業重建，預料會提供5層寫字樓，每層大約8,000平方呎。渣打嘅態度十分積極，喺舊年年初，即係業主仲未公布重建計劃嘅時候，市傳佢已經同置地密斟緊！
絲絲翻查資料，喺○九年嗰陣，渣打已經租咗國金二期12樓同15樓，用嚟做新交易室用途，面積大約3.5萬平方呎。今次再喺中區租用新地方，究竟係擴充業務，定係重新安置現有部門嘅員工呢？渣打發言人就話要賣個關子，等今日同置地舉行簽約儀式嘅時候，先至由管理層親口公布喎。
其實位於中環嘅渣打銀行大廈，寫字樓面積多達25.5萬平方呎，依家仲要四圍猛咁搵新嘅寫字樓，莫非預示咗渣打未來有意大力開拓新興亞洲巿場？