絲絲講場：國泰CEO瞓身sell靚位
尋日係國泰（00293）嘅生日大日子，佢原來已經66歲喇！咁多年以來，國泰為保「一哥」地位，真係花咗唔少心機，繼上次推出長途機新商務客艙後，佢哋乘勝追擊即將推出全新地區性商務客艙，CEO史樂山尋日仲親身示範，試完梗係會「賣花讚花香」，佢話個位好舒服、又夠闊，更重要嘅係個扶手仲可以拎起，咁樣乘客就唔需要將張餐枱收起，先至出到個位，絲絲都覺得真係好方便呀！
史樂山仲話，呢張新座椅參考咗唔同乘客嘅意見，不停咁改良先有呢個「BB」誕生，不過有眼利嘅行家發現擺手機個位，只係放到iPhone個size，其他型號嘅手機就唔好意思喇！
下年一月有得坐
史樂山就即刻好醒目話，多謝我哋行家嘅意見，國泰會作出改良，跟貼潮流咁話。不過各位「飛機迷」想要試坐，就要等吓喇，因為國泰明年一月先會正式推出市場。