成日話股票市場瞬息萬變，但原來各位富豪嘅身家都會大上大落。所以絲絲時不時都會update吓自己，啱啱就睇完最新公布嘅「2012胡潤百富榜」。
已經連續第十四年發布嘅「胡潤百富榜」，由娃哈哈集團宗慶后同佢嘅家族繼一○年後再次登上榜首，成為第三位能夠兩次登上中國首富寶座嘅企業家。
據統計，宗慶后家族嘅身家有成800億元人民幣，比往年足足多咗120億元人民幣！
不過有人歡喜有人愁，上年位列榜首嘅三一重工梁穩根，今年就因為旗下兩間公司股價下跌，搞到身家「大縮水」跌咗三成四，由第一跌落第五位。而今年嘅平均財富係54億元人民幣，雖然按年下跌8.5%，但比起十年前就增加咗十倍。
除咗富豪排名之外，「胡潤百富榜」仲統計咗其他資料。例如最多企業家住嘅城市係北京，但佢哋就最想喺廣東省設立公司總部。仲有呀，原來上榜富豪最多人生肖係屬兔。可能兔仔除咗身手敏捷，連做生意嘅頭腦都特別靈活。
值得一提嘅係，打入十大富豪榜有兩位新人，分別係排名第七、騰訊（00700）主席馬化騰同排名第十嘅陳麗華，而十大富豪中，來自房地產行業最多，有5位，以飲料、IT為主業嘅有2位，其中有3位曾經做過百富榜首富添。
余詩韻