投資動向：投行另一搵銀財路
借殼上市被稱為Back Door Listing，消息曝光前一切要暗中進行。證監會早年收緊注入資產的業務性質、價值，管理層等多個準則，定下24個月期限，以限制買殼活動，但依然阻不了近年的殼股潮，今年尤其多，原因之一是市況影響下，新股上市難，急需海外融資平台的內地房企惟有「走後門」，藉入主香港上市公司擴大融資渠道。
至於做開上市保薦工作的投行，無刁可做下，惟有落足嘴頭多攻殼股，主動找具備賣殼條件的上市公司傾生意。其實，○九年因全球放水股市大反彈以來，上市新股破晒紀錄，部分更是集資額不多，如專業旅運（01235）一一年上市集資額只有4,950萬元，現市值也不過是2.15億元，仲平過一隻殼價。行內亦有「啤殼」的術語，指上市花費唔少，但估值唔貴，集資又唔多的公司，搞咁多無非為求有隻殼，股東賣殼賺多筆。前稱威達國際的萬佳錫業（00195）○八年十一月上市，一○年二月就已變相賣殼。
殼價有市，但當中大有學問，買賣雙方「握手」後都有排傾，因買方是連殼連資產一齊買，還是淨買殼，如何注資，到賣方的管理層要繼續留任至限期過的綑綁期等，雙方如何合作都好重要，買賣前其實要雙方「起底」，仲要避過技術問題。