繼美國聯儲局推出無時限的QE3之後，日本央行亦大開水喉，受量寬沖喜的港股於20,500點之上徘徊。同時間，殼股尋寶潮因萬科、金地、招商地產等大型內地房企來港買殼而再度掀起，前車可鑑，成功賣出的殼股短時間內狂飆，如僑福企業（00207）由九月初2.2元水平，到九月十八日高位見7.06元，升得又猛又急，正合一眾愛搭順風車的投機人士胃口。
近日疑似殼股的三四線股仔禾雀亂飛，單日炒高四五成，就算喪炒之後股價大跌，市場依然樂此不疲。真亦假時，假亦真，這類喪炒股實際有不少趁機渾水摸魚。
除主板尋寶外，長年成交低迷的創業板股一樣有市有價，創業板殼股的價錢約是主板的一半，總計千多間上市公司，潛質靚股大大話話都有幾十間，數目話多唔多，話少唔少，咁多點選擇？無針無線的小股民，要尋寶，至緊要有閒錢、有耐性，等得兼忍得之餘，仲要識得分。
好多時殼股都是市值細，資產淨值有折讓及業務簡單，無訴訟及重大或然負債，乾乾淨淨的公司。目前殼價叫到3億元，而部分大股東要持有一間股價低過資產值的公司，維持上市地位的各類開支又不菲，又要受到上市規例諸多限制，倒不如善價而沽，出售後逐步取回資產，點計都划算。
市值細雖然好辦事，但這又不是殼股的必然條件。近日成功賣殼的星獅（00535），股價在飆升前約0.232元，相當於市值15.8億元，絕對不可列入細市值之列，卻同樣被金地集團睇中，可見此非硬性標準。潛質殼股通常是股價較資產淨值有折讓的公司，上周市場不斷在大折讓的公司尋寶，如金寶通（00320）、力寶（00226）、力寶華潤（00156）突然急升。不過，類似的折讓長年存在，按此標準來搵殼股的成功率好難講，炒作成分居多。
繞過正常上市渠道，借殼上市無非是求取一個捷徑，出售股權的股東最少持有五成以上或多至75%權益，方便新買家日後要清理及注資時通行無阻，避過其他有影響力的股東爭拗。
其實有條件成為一隻靚殼，最關鍵的因素是控股股東無心再戰。個別老牌公司，因主事人年事高，接班乏人，公司業務不斷萎縮，賣殼離場無可厚非。現時的中國海外宏洋（00081）前身是蜆殼電器，一九八四年上市，創辦人過身後，連上市公司都轉手。
星獅向金地賣股前，市值都超過10億元，早前曾作私有化失敗，擺明對上市地位不戀棧，退出之心路人皆見，結果不出數月成功賣殼。新澤控股（00095）及至祥置業（00112）亦曾與第三方傾談出售，後因條件未達成而取消，看來仍欠一道東風。
乘着殼股潮，近日炒起的股份計有時富金融（00510）、網融（01049）、爪哇控股（00251）、安全貨倉（00237）及博富臨（00225）等等，其中不乏平日成交稀疏的股份，但亦有每次炒殼有份，最終都係煲無米粥的渾水股，股價每多炒高散貨後極速打回原形，股民投機炒作至緊要睇勢而為。其實，有心賣殼的在走漏風聲前大都是有咁低調得咁低調，最好無咩成交。按此標準，股價大起大落的，似乎談不上具備殼股的特徵。
殼股真假難分，即使是靚殼，要賣殼成功都要配合天時、地利、人和。最近炒作內房企業來港搵殼，有地產成分的殼股被「點燈」，另外就傳內地券商想借本地有證券牌的上市公司平台發展，傳聞紛飛，辨別真假不易。
另外，熱潮一旦過去，成交可以跌到無人問津，走貨唔易，投機炒作人士絕對要打醒十二分精神。