萬眾期待嘅QE3喺上周推出，道指創○七年海嘯後收市新高、納指更創二○○○年後收市新高、歐股全線上升、恒指逼近兩萬一、本地地產股、資源股、港交所（00388）紛紛受追捧……哇！一片欣欣向榮！QE3一出，就好似維港上空嘅煙花綻開咁璀璨。但剎那光輝代唔代表永恒？QE3之後，啲股又會點行呢？
QE3嘅存在，唔使諗一定會令資產價格上升。政府當刻最唔想見到嘅就係樓價再升高，所以變數就會係政府出唔出狠招去壓抑樓價。但Prof. J覺得呢個機會唔大，反而政府會不斷做啲小動作，希望可以溫和地調控樓市，以防形成資產泡沫。但其實資產並唔剩止磚頭一種，仲有其他種類，如黃金、石油同農產品等等。
以黃金為例，國際金價喺QE3一出即刻彈番上1,780美元水平。黃金一向具避險同抗通脹作用，尤其是美國咁印銀紙法，美元有貶值壓力，港元同美元掛鈎，香港人都真係要諗諗計點抗通脹。
Prof. J一向都贊成繼續揸實質資產，如果嫌磚頭成本高，少少哋都買番啲金啦。
唔好誤會，買金唔等如買金礦股喎。始終金礦股係一間上市公司，受開採量、公司管理層、外圍環境等因素而影響股價走勢。不過，可以買黃金ETF，因為佢真係揸住一個實金金庫，咁買佢即係間接持有喇。不過，因為ETF會收少少管理費，小數怕長計，中線投資好喇，唔適宜揸到地老天荒。
香港大學電子金融服務榮譽助理教授 徐燦傑