今年多隻零售股都有高管跳船，思捷（00330）同I.T（00999）高層換人最矚目，今次輪到六福（00590）老臣子羅添福以追求個人目標為由辭任財務總監（CFO）。
雖然六福連新任掌櫃都搵埋，但尋日已有兩間券商將公司降級，六福股價更一度跌近7.87%，睇嚟六福要做番啲嘢安撫投資者先得。
六福新任首席財務總監陳素娟（Kathy）好多行內人都識，佢喺○三年起加入堡獅龍（00592）、由財務董事擢升到CEO兼副主席，前年八月亦係為完成個人目標而辭任。兩年無露面嘅Kathy今次做番老本行，應該無咩問題，不過大家都好奇今次六福請Kathy出山用咗幾多誠意，因為佢喺下周一連公司秘書都要撈埋。