絲絲講場:按證總裁交棒依然「旺翔」

服務咗香港按揭證券公司八年幾嘅劉怡翔,做到年底就會卸任總裁,享受退休生活。唔知按證係咪特別「旺翔」,總裁一職將會由金管局助理總裁李令翔接任,出年一月一日生效。

上半年盈利倒退26%

按證執行董事彭醒棠,大讚劉怡翔喺任內貢獻良多。不過講番按證今年上半年業績,比起舊年同期就差少少,半年盈利5.21億元,比舊年倒退咗26%;淨息差亦按年跌咗30點子,報1.5%。

喺最近一、兩年,按證先後推出安老按揭、中小企融資擔保、小型貸款計劃,動作多多,為咗集中資源搞好香港業務,按證宣布將會退出幾年前成立,分別同馬來西亞央行同深圳市人民銀行組成嘅兩間合營公司,仲話有錢賺添。

另金管局已安排現職銀行監理處主管嘅李永誠,接替李令翔騰空出嘅執行總監(法規)一職。