金融界拳手嘅格鬥之夜又嚟喇！呢個叫「對沖基金搏擊之夜」（Hedge Fund Fight Nite）嘅活動，今年有70個包括銀行、對沖基金嘅金融機構代表參加「打擂台」，人數破晒紀錄，當中仲有十位女士，長勝將軍滙豐誓要力保「金腰帶」名譽。
滙豐咁緊張呢場比賽，皆因佢哋過去係三戰三勝，為咗呢條金腰帶，滙豐銀行國際（香港分行）亞洲區營業經理Dominic Smith都話大賽嗰晚差唔多每個回合都有同事出賽，總共有八位參賽者一同出戰，呼聲好似幾高咁喎。想知佢哋保唔保得住條金腰帶，真係要密切留意十月二十五日嘅戰況喇！
呢個賽事由○七年開始，參賽嘅都係對沖基金、銀行、金融機構。絲絲有老友參加咗，六月就開始要進行地獄式拳擊特訓，唔使一個月，腰圍細咗幾吋。經過呢一輪特訓之後，70個參賽者得19個「有得留低」，其餘嘅已out晒，Dominic Smith話佢哋嘅同事，依然未被淘汰。比賽當晚，更只會有12個參賽者進入最後階段，喺六個回合內分出勝負。
余詩韻