Market Insight：電訊股唔平唔買

見微知著，上述幾個引子，加埋中日兩國喺釣魚島海域晒馬，軍事專家估計中國連潛艇都出埋，即使現今問一百個人，一百個都估中日都無條件，亦都唔想開戰。不過，唔怕一萬最怕萬一，一旦擦槍走火，真係大大鑊。昨日身邊炒鬼，個個當大利市機透明，齊齊上網填表抽iPhone 5博轉售搵餐晏，再唔係發白日夢，幻想自己成為一千三百九十八萬分之一機會的幸運兒，進身城中億萬富豪之列。

昨日滬綜指跌2%去到2,024點今浪新低，中資股拖累下，港股全日無段好睇，恒指收市跌250點報20,590點，主板成交減少至526億元。

放大圖片

放大圖片

消息出盡慎防調整

美國聯儲局上星期出到絕招QE無限，即使華爾街三大指數未有疲態，商品及匯市炒家集體Sell on fact卻是極為明顯。紐約期油短短五日，隊低十美金，由100.42美元撻落91美元，美匯指數由78.6連彈四日，去番79.6。

技術上，港股趁勢調整先試上星期遺下的20,146至20,475點上升裂口之機會唔細，尤其鹹魚翻生的莊家殼股，炒過一輪之後，就連長期發霉的爪哇控股（00251），都出現一日挾高一成七的壯舉，禾雀亂飛格局咪話唔驚，昨晚歐元區多國公布九月份PMI數據，歐元區綜合數字跌至45.9，創○九年六月以來最低，服務業PMI更遠比市場預期的47.5低，只得46，唯獨德國PMI初值見反彈，由47回升至49.7，差些少返回50安全線樓上。儘管人人都知股市跑在經濟之先，但歐美日出招之後，短期可見利好消息出得八八九九，周末假期唔想心掛掛，今日真係一動不如一靜。

中移相對聯通穩陣

兩間內地3G經營商，先後公布最新上客數據，中國聯通（00762）八月份新3G上客量306.9萬，比七月309萬低，少過市場預期的315至325萬，同時間，對手中移（00941）新增客戶由七月190萬激增至八月的316萬戶，是今年首個月錄得300萬以上淨客戶增長，終於超前聯通。

巨無霸中移第三季開始，股價明顯跑輸比兩個新3G玩家，至今微跌0.2%，同期聯通升27.6%，中電信（00728）升34.4%，TD網絡硬件限制仍多，佢同另外兩間3G經營商逐漸形成三分天下之勢，加上中移半年純利升幅僅1.5%，較預期的4至5%少，八月中份成績表一出，幾日股價跌近一成，令股價差距進一步擴大。

若無預知能力，要準確炒賣每個月上客數字，難度極高。七、八月氣勢如虹的聯通，昨日跌5.2%收報12.46元，表現排在49隻藍籌中最尾。

七月至今，聯通兩次反彈去到13.78元及13.5元，貼近250日線便告回落，走勢上，250日線（13.6元）已成為中期阻力，或者一五年前，聯通增長會比中移快一點，但一三年市盈率20.6倍，高中移一倍以上，估值差距已把增速反映，股市陰雲密布下，兩選一，古勝始終覺得中移較為買得安心。

追炒股仔嚴守止蝕

大市氣氛受挫，近日喪炒嘅細價股亦立即謝晒，其中前日股價一度急升八成嘅時富金融（00510），股價跌穿前日低位唔在講，成交大幅縮減，炒家上錯船真係恨錯難返！所以話，即使諗住跟勢短炒股仔，亦要揀嚟炒，股份價格長期成「仙」總有原因！呢番話，也許有番咁上下炒齡嘅投資者會更有共鳴。

另外，炒股仔亦好講大市氣氛配合，指數企喺高位可以膽博膽跟炒；一旦指數確認向下方向，就要嚴守止蝕，盡快疏散離場。好似昨日A股跌勢甚急，一旦後市滬綜指跌穿兩千點心理關口，港股亦難免出現較大幅波動，博反彈宜三思！

古勝