上個禮拜尾，伯南克出其不意開咗QE3，一招無限期每月購買400億美元機構按揭抵押債券，所有地產、商品股彈到飛起。真係學《西遊記》嘅星爺話齋，如果要為呢個QE3加一個期限，Prof. J相信會係一萬年，印開錢，又會停唔到手。
「伯有張良計、英有過牆梯」，一出QE3，金管局即刻出招應對，收緊「二套房」按揭成數，希望可以壓制樓市過熱嘅情況。但啲地產樓盤一於好少理，即刻做嘢以迎接QE3。好似新地（00016）嘅「瓏門」，就率先推出較有競爭性呎價嘅新單位，營造一種抵買嘅感覺。有實力嘅投資者又唔會因為收緊按揭而受影響，反而需要為資金搵出路添。所以喺呢個時候推啲平嘅單位，可以吸引到一班要搵地方泊錢嘅投資者。
成日都有朋友問依家仲應唔應該買樓？夠錢畀首期、供得起就買啦。事關低息同水浸嘅環境只會「此恨綿綿無絕期」，但係有啲朋友真係未準備好，買住地產股先又好唔好呢？買磚頭同買地產股最大分別係前者直接買有形資產，等佢升值；而後者就只係買間上市公司，但股價同樓價未必100%掛鈎。
睇番呢兩年走勢，又真係磚頭嘅回報比地產股更吸引。事關股市會受外圍種種因素影響，搞到啲地產股浮浮沉沉，同實際業務走勢偏離。但買地產股入場費低、流通性高、現時估值偏低、交易又唔受政府措施影響。只要間地產公司正正常常，唔係玩財技，而公司土地儲備足夠、市帳率低，都不妨買番啲作長線投資。
香港大學電子金融服務榮譽助理教授 徐燦傑