絲絲講場:俄鋁歐柏嘉聞iPhone 5即笑

iPhone 5同俄鋁(00486)好似大纜都扯唔埋,查實又有關係喎。俄鋁最近喺莫斯科贊助咗個大型國際鋁業會議,俄國首富兼俄鋁行政總裁歐柏嘉(Oleg Deripaska)都有出席,見吓班投資者,有人就問佢iPhone 5有無包含鋁,佢聽到後忍唔住笑住答有。iPhone 5咁熱賣,唔怪之得佢忍唔住笑啦!

國際會議文化助興

俄鋁喺香港上市之後,做咗好多文化工作,等香港人認識多啲當地文化。絲絲都有去呢個國際鋁業會議,聽咗好多好嚴肅嘅討論,好彩俄鋁深明絲絲痛苦,安排咗一場令人回味嘅party。

絲絲帶定戰衣,悉心打扮去night party。一去到絲絲已經畀門口嗰位「索俄女」吸引住,就算唔識俄文都冇所謂,指手畫腳咪得囉!成晚主要係由一隊俄羅斯民族音樂嘅團隊表演,原來佢哋有成過百年歷史!成team幾十人,每個表演都好精彩,好有氣氛,仲見識到俄羅斯獨有嘅民族三角琴添,不枉企足成晚呀!

聽講好多有份出席會議嘅代表,都會獲邀請去開P,但又唔會年年有得睇,所以大家呢晚都好盡興,珍惜呢次難得機會。