絲絲講場：黎大鈞快閃 台下一舊雲
數碼通（00315）早排嘅取消無限上網彈弓手事件，製造咗唔少公關災難，今個月獲蘋果公司「欽點」，搶先為iPhone 5喺本港提供全面4G覆蓋，原本係加分之作，點知一個唔好彩，出現咗因網民鬧爆撤回「500元按金訂機安排」，尋日又整單「快閃記者會」，隨時又搞到公關姐姐做餐死！
浪費宣傳「雲計算」機會
絲絲都好明白，同蘋果公司合作嘅電訊商，會好縛手縛腳，喺談及iPhone問題上係限制多多。尋日數碼通約咗傳媒講「雲計算」增值服務，事先講明唔會答iPhone嘅問題，老友話OK喇，先小人後君子，所以都趕去聽吓總裁黎大鈞嘅介紹。
佢上台花咗約十分鐘，講解完公司都未知幾時推出嘅「雲計算」增值服務後，竟然快閃離場，台上得番張空椅，老友想問吓多啲「雲計算」嘅資料都唔得。呢吓快閃搞到全場噓爆，大家諗住遵守規矩，點知連大會主題都只係齋聽，難怪個個怒火沖天！
話時話，「雲計算」服務都可以反映數碼通4G嘅潛在價值，如果黎總願意花啲時間，講講服務嘅具體細節，本來都可以為自己嘅4G以至iPhone 5做另類宣傳。最終無助推廣服務，但搞出一個公關災難，咁又何苦呢！