依家全球吹起「頁岩氣」熱，呢股熱潮喺中國內地一樣炒到㷫合合，唔少炒呢個概念嘅股份，股價都升到飛天，難怪睇到行外人都心郁郁，想話分杯羹。但估唔到連內地最大嘅黃金生產商紫金礦業（02899），原來都對呢瓣生意有興趣，董事長陳景河仲想搵美國駐華大使駱家輝「做媒」，想話同美國嘅頁岩氣公司合作。莫非頁岩氣呢個概念，真係有黃金咁堅？
絲絲聞訊即刻同紫金方面了解吓，發言人好坦誠咁話，紫金確實有研究頁岩氣呢個行業，仲話內地嘅頁岩氣仍係勘探階段，而全世界開發頁岩氣最先進嘅國家就係美國嘞，所以睇吓同美國公司有冇得合作，了解呢方面最新嘅技術。咁係唔係搵駱家輝幫手先？
發言人就話陳總同駱家輝喺公開場合確係有傾過偈。有內地傳媒就話，陳景河喺一個論壇同駱家輝講，想請佢做媒，介紹吓美國嘅頁岩氣公司一齊合作，喺中國開發頁岩氣。
不過黃金同頁岩氣，聽起上嚟好似風馬牛不相及喎！發言人就話，其實頁岩氣都係礦業嘅一種，不過就再三強調紫金仲喺度研究緊，唔好以為有咩實質項目嘞！