絲絲講場：星展讚家長式監管
喺金融服務呢瓣，香港同新加坡真係鬥餐死，喺數字上嘅比較，係客觀數字，無得拗。但講到監管制度，就抽象啲，仲要係針唔拮到肉就唔知痛。絲絲有好多賓卡老友，都話香港對銀行嘅監管愈嚟愈嚴，真係可以話係「聞之色變」，之不過，星展香港董事總經理兼北亞洲區私人銀行業務主管忻依文（Yvonne）嘅睇法就有啲特別，佢話「香港啲監管嚴啲，都唔係唔好o架」，因咩解究佢會同啲行家唱反調呢？
忻依文：香港上咗軌道
Yvonne加盟咗星展兩年，之前喺滙豐、花旗呢啲大銀行做過，係一位資深銀行家，尋日佢就同絲絲分享咗對香港同新加坡兩地監管嘅睇法：「香港監管係『家長式』管理，新加坡就比較輕鬆啲，但係你一衰咗，佢（監管機構）就嚟嘈你，咁你話上咗軌道有保障好呢（本港情況）？定係做錯嘢人地嚟砍你好呢？哈哈哈。」真係形容得鬼馬喇！
私銀客戶投資較成熟
Yvonne仲話，好開心自己管理嘅係私人銀行，唔係零售銀行，因為佢試過走入分行買投資產品，「無個幾兩個鐘都唔好旨意離開銀行，因為客戶經理有一大堆台詞要唸（講解產品內容），都幾痛苦o架！」
佢話私人銀行嘅客戶喺投資方面就比較成熟，係私銀業務嘅好處咁話喎！
余詩韻