「到底點樣park錢好？」一聽到QE3，對於甚麼執行細節，經濟會否有實效等等，一般人興趣都不大，只覺得又被伯南克搵笨，令手上現金貶值，被迫再打一場身家保衞戰。
化繁為簡，人棄我取，趁機再買REITs及防守股。上周五大市勁升，基金經理為追回報而換股，令上述股份反而受壓，正是買貨收息的良機。當然不是零風險，但買金何嘗是必勝？上兩次QE期間，金價一樣飄上飄落，如果對比長期表現，REITs仍然跑贏。
貴金屬無息收是死穴，只宜作為資產配置其中一部分。而REITs物業組合分散，只要經濟環境不太差，收益率上升拍得住通脹並不難，在錢唔係錢的年代，可望再上一層樓。
逆市行動，短期的表現一定會比指數的表現為差，可是散戶並非職業的基金經理，所以無需要向客戶交代及與指數比併，反而睡得安寧，穩穩陣陣保住老本更重要。
QE根本是蠶食平民百姓購買力的毒藥，買些資產自保是有需要。一般股票風高浪急，未必合適，難得防守股被拋售，十分值得行動。揸現金是輸硬，炒股票八成輸面，倒不如用耐性換回報，揸REITs跑贏通脹算數。
至於中資股動力澎湃，主因是淡倉回補，上次QE2期間表現極廢，今次QE3稍有不同，是中國雖然已不似放水，但至少會出一堆政策扶持。
不過，市場對中資公司的能力看法已經大打折扣，商業模式令人難有信心，短炒可以，長揸則免問。
難得股票有得炒，想投機的話不妨可以投入，雖然月中買Call是蝕章，補倉盤買上的特色是有如放煙花，又快又勁而且欠缺持久力，買即月Call博幾日仍然可以，又或者可以反過來，暫避其鋒，當出現大成交急升之後，才入市買入個別長期弱股遠期Put。
‧趁機買REITs
豐盛金融資產管理董事 黃國英（作者為註冊持牌人士）