孖妹S檔案：股神是怎樣煉成的

基礎篇

彩兒：話明「股神」，即係靠買賣股票賺大錢！但點解買股票可以賺錢呢？

高妹：一隻股票代表一間上市公司，「買入」股票即代表你成為呢間公司嘅股東。當一間公司嘅業務規模愈做愈大，自然需要開設分店、增添人力，但由於資金有限，所以需要向市場（投資者）進行集資（借錢），從而獲得更多資金去發展。理論上，當呢間公司賺錢愈多，其「股票」就愈值錢；相反當公司經營不善，年年蝕錢，咁「股票」就可能變得一文不值。當然，呢個未計及市場情緒點樣影響股價啦。

放大圖片

放大圖片

彩兒：公司嘅賺錢能力會令股票價值不斷變化，於是提供了低買高賣嘅機會，所以大家可透過買賣股票嘅升跌嚟賺錢。而買賣股票之前一定要知道兩個元素：前景及風險，分別決定贏錢及輸錢機會。另外，股市係零和遊戲，有人贏錢自然有人輸錢，難怪散戶成日話：呢個係合法大賭場。知己知彼，百戰百勝，炒股都要知對手風險o架！入市前，不如先搞清楚你嘅對手係邊個先喇？

放大圖片	放大圖片	何啟聰

揀股篇

高妹：揀股需要有基本分析，但由於科技愈嚟愈進步，所以大家又會做埋技術分析。咁你又知唔知基本分析有咩步驟呢？

彩兒：基本分析係指因應不同行業及公司本身嘅經營狀況作出分析，跟住預測其盈利增長前景。當中步驟可分為（A）查核上市公司會計帳目是否準確清晰，避免其造假數之可能性；（B）檢查上市公司是否每年盈利都有穩定性增長；（C）上市公司之派息能力高低及次數多少；（D）上市公司做生意之透明度高低；（E）有足夠現金流作業務發展，避免長期向外發債或貸款；（F）負債比率要低，以免資不抵債時被清盤或影響盈利能力。

高妹：孖妹對揀股票都有一番心得o架！點知就畀我哋發現，孖妹揀股八式同股神巴菲特嗰八項揀股準則都幾相似喎，只能說句：「英雄所見略同！」

投資通病篇

彩兒：投資講實力，亦講運氣，不過有時輸錢唔可以怪大戶，甚至怪市場。大家間唔中都要自我檢討吓，因為散戶永遠都有投資通病，錯完又錯，犯完又犯。而o架孖妹就列出最多散戶所犯嘅五項投資通病，希望你哋可以痛改前非喇！

投資心理篇

高妹：正所謂「要贏人先要贏自己！」受大市影響，散戶情緒容易忽高忽低，最終咪造成「高追低沽」！之但係，孖妹都係過來人，好明白大家嘅弱點，所以我哋一定要培養冷靜、耐性、獨立、客觀四大思想，同時放棄盲從、貪婪、恐懼、猶豫四大惡習，咁樣先至有機會做「股神」o架！

少年股神誕生回憶錄

當年因「少年股神」揚名，現為瑞信香港認股證及牛熊證銷售主管嘅何啟聰說：「真正嘅股神必須對投資充滿興趣，否則永遠只會贏到短線嘅財富。」他中三開始對股票產生濃厚興趣，每天看兩份報章嘅財經新聞，留意股市走勢，對股票進行深度分析。

大學一年級參加坊間「少年股神」投資比賽，一炒成名，但何啟聰坦言：「當年贏咗比賽後，我更加要求自己對金融知識愈知愈多、愈學愈深。如果你對投資無興趣，根本無可能維持學習之心。

需要一個學習過程

現時環球股市已非分析基本因素就可了解，政治因素可以影響股市，股市升跌可以影響股價。講真，短炒兩至三次賺到大錢嘅，我相信大把散戶做得到，但咁唔代表你就係股神！」

他續說：「投資買賣需要技巧，講求獨立思考與客觀分析；投資輸贏則講求冷靜與耐性，要做到勝不驕、敗不餒，不做情緒嘅奴隸。」因此，股神嘅誕生需要一個學習「吸收」過程，首要條件要對投資有興趣，繼而擁有知識基礎、獨立客觀性格、堅強嘅心理質素。

高妹、彩兒

若有料報畀高妹同彩兒或有嘢問，可電郵money.biz@opg.com.hk