絲絲講場:渾水內地擬褪軚

研究機構渾水舊年「唱衰」綠森(00094)母公司嘉漢林業一戰成名,不但搞到對方破產,仲引發起一場針對中國民企嘅民企風暴!不過,呢排佢哋呢類沽空機構都好頭痕,因為正面對包括創新工場董事長李開復等超過六十位各方名人聯合聲討之餘,仲話畀公安恐嚇添。

渾水創辦人Carson Block最近接受一間中國傳媒訪問時就話,佢哋喺中國請嘅調查人員的確係受到有關方面嘅威脅,有啲仲受到人身威脅添,有部分仲已經停止咗同渾水合作,所以Carson都話,中國已經再唔係佢哋優先關注嘅市場。

反擊李開復欺詐指摘

至於渾水最新對民企新東方嘅攻擊似乎唔太成功,佢就話幾個禮拜內會再出有關新東方嘅報告,亦都堅持認為佢嘅核數師德勤好快會辭職。

Carson亦都反擊咗李開復等人話沽空機構做法係欺詐嘅講法,Carson認為,事實上好多中國民企真係欺詐,李開復應該去鬧佢哋至啱,仲話沽空機構可以增加市場透明度,唔應該掉轉頭反被懲罰。