香港股市有「五窮六絕七翻身」，內房市場都有「金九銀十看樓市」，即係每年九月、十月都係內地樓市黃金檔期。絲絲發覺近日有好多內地房地產商都出手買地，但要數最狠最勁，梗係全國房企龍頭嘅深圳萬科啦，兩個月就用咗過百億元（人民幣‧下同）投地，萬科總裁郁亮仲牙擦擦話，「企業不差錢只差地」，即係話萬科家陣資金好充裕喇！
其實萬科自四月就開始密密手咁買地，到依家為止就已經有27個新增項目，埋單承惠120億元。一踏入「黃金九月」，可能諗住內地樓盤銷售唔錯，萬科簡直見地就搶，六日內豪花68.84億元，連續喺青島、廣州、合肥、順德四個城市搶地，唔係地王都睇唔上眼，未來兩個月更會加大推盤力度，做到貨如輪轉。點解萬科出手咁闊綽？鬼叫萬科八月銷售飆到113.5億元咩，同比增長有8.3%，成績好自然要入番啲貨喇！
不過有傳中央將加大調控力度、擴大房產稅試點，為樓市降降溫，唔通萬科真係一啲都唔擔心？郁亮就淨係話自己對有關壓抑樓市措施既不支持、也不反對，似乎真係胸有成竹咁喎！