阿里集團旗下淘寶網，向為內地以至大中華地區嘅網購龍頭。但自騰訊（00700）今年較早時間進行重組，並為電子商貿事業部門組成股份公司後，騰訊以QQ網購為主嘅網購業務亦準備向淘寶網進迫，兩者嘅戰線更由內地延伸到香港。騰訊旗下嘅QQ網購尋日就宣布，正式全面進軍香港，實行唔畀深入民心嘅淘寶專美。
騰訊嘅QQ網購同拍拍網，目前內地市佔率雖然同阿里嘅淘寶及天貓有一段距離，但係喺業務發展，騰訊無疑正處於快速增長嘅階段，就以QQ網購為例，年底總商戶數目將會增加至一千家，至於拍拍網喺內地拍賣網站嘅排名，亦只係喺淘寶之後，佢嘅市場影響力正係持續增加。
講番騰訊進軍香港網購嘅計劃，旗下嘅QQ網購同拍拍網，除咗正式推出香港網站外，QQ網購亦會同香港嘅Qolala.com合作，開展包括帳戶充值同埋物流配送嘅業務。用戶今後仲可以透過喺本港主要嘅便利店，用預付方式為QQ網購進行充值，從而解決喺網上購物嘅跨地支付問題。
余詩韻