呢排全球經濟環境都麻麻哋，打工仔有多餘錢都唔敢去玩，搞到唔少度假設施嘅生意都一落千丈。好似美國嗰邊，有五個度假設施抵押咗畀對沖基金公司普爾遜（Paulson & Co.），後來過咗贖回期，啲生意又無起色，「賺錢之神」普爾遜就喺上年宣布佢哋破產，依家仲話要拍賣呢幾個設施咁話。
呢批設施宣布破產後，普爾遜已經好快手將邁阿密嘅高爾夫球同水療設施賣畀人，其他四個設施，包括喺加州嘅La Quinta Resort & Club同The Claremont Hotel Club & Spa、喺夏威夷嘅The Grand Wailea、以及喺鳳凰城嘅The Arizona Biltmore，會喺未來兩個月內拍賣。
但既然依家都無人去度假，仲有邊個肯拎錢出嚟買呢啲設施呢？
之唔係新加坡政府囉！絲絲就聽到消息，負責管理海外資產嘅新加坡政府投資公司（GIC）決定參與呢次拍賣，仲諗住出價15億美元（約117億港元）買起四個設施添！十一月八日進行拍賣，照目前情況，應該都無offer可以超過新加坡政府嘅15億喇。