商品貿易巨頭嘉能可（00805）尋日先至出咗「終極叫價」，Xstrata嘅獨立董事會都仲未決定話要接納個收購建議，竟然已有基金股東率先「Hold」唔住，搶閘衝出嚟講「我願意」，將一顆「恨嫁的心」表露無遺。
話說英國《金融時報》喺嘉能可公布咗最新交易詳情之後，聯絡咗Xstrata嘅頭20大股東，問佢哋對交易嘅意願。
吓！勢估唔到大部分嘅回覆都係「Yes」喎，其中仲包括之前反對交易嘅標準人壽添。
其實嘉能可呢單刁都搞咗半年有多，股東會都「退後」咗兩次，莫講話嘉能可唔耐煩，好多坐住批貨等「甩手」嘅基金股東都想快啲有得「閃」，「恨嫁」係難免。
但係仲有啲死硬派，仍然選擇企硬。好似之前同標準人壽同一陣線嘅施羅德就無「轉軚」，繼續反對交易作價過低；仲有激進派基金Knight Vinke，好似同錢有仇咁，係都要「反對」個交易。至於真正「有料到」嘅卡塔爾主權基金，反而惜言如金，仲未肯講企邊一面。