曼聯同facebook嘅上市，無可否認係今年焦點，點知兩隻股表現都有啲嚇人，心水清嘅老友，批死曼聯會步fb後塵，畀證券行睇死。
fb股價屢創新低，曼聯都唔係好得去邊，經過咗新上市嘅蜜月期後，證券行開始出評估報告喇，好似野村咁，一針見血，質疑曼聯嘅球星人工實在太貴，恐怕會蠶食股東利益。
野村質疑曼聯球星人工太貴不無道理，舊年曼聯全年人工開支高達1.53億英鎊，佔總收入3.31億英鎊差唔多46%，真係咪話唔驚人。隨住八月份「雲隊長」雲佩斯強勢加盟，而佢周薪又高達20萬鎊，僅次於朗尼嘅22萬鎊，絲絲睇怕今年人工使費都只會有增無減。不過其實野村都唔係一面倒睇淡，目標價就睇13美元。
美銀美林話曼聯盈利好易受場上球員表現影響，所以建議投資者「保持觀望」，但係目標價都有15美元。曼聯最新收市價13.19美元，招股價為14美元。
絲絲老友就話唔使咁擔心，仲有分析員睇好曼聯嘅，又話遍布全球嘅「紅魔鬼」球迷係球會最佳信心保證，佢哋定嘅目標價分別達20、17及18美元。