絲絲講場:睇Scailex通告要識希伯來文

企業趨向全球化,就連睇上市公司資料亦要多國語言化,投資者最好都係學多幾種語言傍吓身,但斷估唔會學希伯來文囉!

尋日絲絲就遇到大難題喇!以色列企業Scailex,尋日話和黃(00013)同李嘉誠基金會,無權單方面取消收購交易,絲絲即刻上網搵原裝正版嘅通告,大件事,點解一隻字都唔識,搞咗一輪至知係希伯來文。

關心呢單刁嘅,點止絲絲呀,中環圈老友都好心急想知,究竟個通告講乜東東,雖然香港係國際金融中心啫,去邊搵個識得希伯來文嘅人呀,惟有大家一齊上Google,搵翻譯喇,但都係譯到大概意思咋。

和黃:按協議停收購

講返呢單刁,和黃同李嘉誠基金會早前以「未能符合交易所列條件」為由,決定終止收購Scailex嘅計劃,而Scailex目前嘅最重要資產,就係和黃喺○九年向佢出售嘅當地流動電話業務Partner。

對於Scailex尋日嘅講法,和黃發言人強調,和黃同李嘉誠基金會嘅旗下公司,係按協議條文叫停收購交易,更無理由要被罰款或作出賠償,更表明若對方要對簿公堂,和黃同基金會嘅一方一定會竭盡全力,保護本身嘅合法權益!