依家揀股，最緊要有穩定收入，橫睇豎睇，電訊公司就最穩陣。中國電信（00728）主要為服務區內嘅用戶提供綜合性嘅固定電訊同相關服務，寬頻業務回報還算可以，集團亦會不斷專注於提升項目回報上。另外，早前收購CDMA資產，令盈利更上一層樓，一三年更增加派息比率，自必然吸引眾多穩陣基金支持。
集團扣除移動終端銷售收入後嘅經營收入增長8.1%，最重要係其移動、有線寬頻業務高速成長，為集團整體業務結構提供動力。今時今日用嘅嘢最緊要夠「潮」！中電信清楚認識呢個概念，通過唔同途徑嚟強化重點目標市場嘅銷售額。
另一方面，要讚吓中電信有系統嘅進攻能力！集團近年發展中高端移動用戶群體方面取得優越成績，移動用戶規模增長39.7%，可見集團有能力掌握用戶品味。
集團嘅「天翼寬頻」品牌內容包括「提速度」、「填內容」、「優服務」，如果可以切實畀客戶感受到呢三者嘅優點，往後中電信嘅爆炸力無限大。加上靈活嘅服務計劃，往後電訊市場嘅市佔率隨時畀佢刮走一大截，大阿哥都唔夠佢嚟！睇番數據，市盈率17.89倍，息率1.93厘。繼續追蹤、出發！
香港大學電子金融服務榮譽助理教授 徐燦傑