早前市傳中信証券（06030）投資錄得虧損29億元人民幣，董事長王東明更因此被帶走，原來係三個股民嘅惡作劇，查明事件後，中國證監會尋日終於還中信証券一個清白。
據講，「中信証券海外投資出現巨虧29億」呢個虛假訊息，源自河南張姓網民嘅一則貼子。內地媒體話，呢位係福建省南平個體工商戶，有錢喺身，○七年開始就學人炒股票，由於炒股票持續虧損，為咗發洩個人不滿，把心一橫，揀最大嘅中信証券嚟作古仔，編造虧損訊息，並於今年八月十三日喺網上發布「中信証券巨虧29億」。
一隻手掌拍唔響，謠言之所以滿天飛，通常唔只係一個人嘅事，中國證監會話，另一個陳姓網民，亦有份推波助瀾，喺微博散布虛假消息，聲稱「王東明被帶走」；湖北曹姓記者就將未經證實嘅猜測「里昂證券出現大規模離職」對外公開，結果搞到滿城風雨。
不過，事情終於水落石出，絲絲都為中信証券鬆咗口氣。其實投資股票唔係穩賺，投資者一定要調整心理質素，如果真係輸唔起，最好就避之則吉喇！