內地民企絕大部分係白手興家，加上中國人鍾意子承父業，呢啲企業依家進入另一階段－－搵接班人。《福布斯》最近發布咗個調查，原來內地A股上市嘅民營公司有一半都係家族企業，但只有7%嘅企業完成接班工作，大部分企業仍然由創業嘅一代掌管公司。
A股100間最大嘅家族企業，頭三位係新希望嘅劉永好家族、三一重工嘅梁穩根家族、比亞迪嘅王傳福家族。而喺香港上市嘅內地家族企業，有好多係香港人熟悉嘅，例如排頭位嘅國美電器（00493）黃光裕家族、排第三位嘅碧桂園（02007）楊國強家族、排第五嘅世茂房地產（00813）許榮茂家族。
調查指，截至今年七月中，1,349間上市民企中，有684間係家族企業，佔總數差唔多一半；當中只得45間企業由第二代正式接任董事長。不過有好多準接班人已經入職公司，開始學做生意同吸取多啲經驗。
第二代嘅生力軍除咗有一眾七十後之外，連八十後都開始加入，佢哋多數以董事或副總經理嘅身份進入公司，有啲叻仔叻女仲已經坐埋總經理個位，負責公司日常營運添。報告仲話，穩固同信任嘅親情關係對於企業發展係好重要一環，所以呢啲家族企業當中，父母子女關係佔咗四成七，而「夫妻檔」就佔咗四成六，實行一家人齊齊打拚咁話。
A股上市嘅家族企業似乎比非家族企業搵更多錢，報告指前者嘅主營業務收入有三成增長，比後者多6%；純利增長亦比非家族企業多3%，達34.5%。睇嚟「夫妻/父子/兄弟同心，其利斷金」真係一啲都無講錯！
余詩韻