家族生意企業化高難度
黃達堂畢業後，在外界打拚過才返回捷榮打理家族生意，當時董事會上的全是長輩，而樓下則有一班追隨爺爺及爸爸良久的老臣子，作為當中年紀最輕的一員，最初要將企業轉型，想必遇到相當程度的困難。他坦言，自己曾捱過一段Rough Time（艱難的時期），要推行制度化，首先要說服上司及下屬。
說服上下 成績服眾
Q：最初返屋企打理生意，最大嘅難處係邊？
A：最初將公司模式改變，要Convince（說服）上面，又要Convince下面，第一樣改革就係風險管理，今日無人唔識，但喺一九七八年，無人會諗呢啲概念，咁多年做生意都係講個「信」字。有個老臣子話：「喂，我哋咁多年做生意都係講信用，信我就賒貨畀佢地」，而我唔係咁，要搬成個風險管理系統入嚟，經過一段幾Rough（艱辛）嘅時間，（大家）概念唔同需要融合。做一樣嘢做緊要係成績，當睇到成績，佢哋就心悅誠服。
Q：咁你依家嘅風險管理系統又係點？
A：將客戶分大中細級，每級的信貸額、信貸時間都唔同。制度化分類定賒數期，將壞帳明顯減低，今日只有約0.5%。
Q：除咗風險管理外，仲推行咗咩改革？
A：第二樣係銷售團隊改革，以前個個銷售員走去搵大客，豬頭骨無人啃。之後佢哋要行小組，分香港、九龍、新界，每區分小組，銷售員要交返舊時啲戶口入組，將所得利益交出嚟再分過，行團隊去集中資源。行區域制可集中，對客時間多咗，生意好，佢哋睇到成果就信服。
Q：你點將公司企業化？
A：全部嘢行政策，所有政策同系統，Peter Wong（黃達堂）都要遵守，第一個遵守係我自己，如果我都要守，邊個唔使？