絲絲講場：巴菲特注資仔女慈善基金
絲絲尋日就提過巴菲特好平淡咁過咗生日，不過對佢三個仔女嚟講就好唔平淡喇，事關巴菲特送咗一份大禮畀佢哋，就係承諾將佢嘅投資王國巴郡30億股B股轉贈到三名子女名下嘅慈善基金，實踐施比受更有福嘅道理。
巴菲特係大慈善家。○六年佢已經將自己大部分財產捐畀蓋茨夫婦基金會；兩年前又同蓋茨成立咗The Giving Pledge，周圍勸富豪捐身家做善事。巴菲特除咗對街外人好，對佢家人更加唔話得，好似佢前妻生日，喺百貨公司瘋狂掃貨九十分鐘，事後就由巴菲特埋單。
兒女分三路行善
今次到巴菲特生日，照道理應該係收禮物，但佢就選擇送禮畀三個仔女。巴菲特仲公開喺公司網站寫咗封信，話相信佢哋三個一定會好好利用基金去幫人咁話。
三個仔女嘅基金幫助唔同嘅群組：大女Susan嘅基金專注於美國兒童嘅早期教育；大仔Howard嘅基金就資助中美洲同非洲嘅農夫；細仔Peter嘅基金就以預防女性暴力為目標。