台灣鴻海同日本聲寶（Sharp）兩大台、日上市企業龍頭嘅世紀合作，被譽為「鴻寶戀」，「新郎哥」鴻海董事長郭台銘本來前日出席喺日本堺市嘅記者會，向兩地媒體交代合作進度。
點知郭台銘臨時甩底，大家非常錯愕，仲以為合作拉倒咗，原來係佢嬲大家市儈，淨係向錢看，只關心「鴻寶戀」使咗幾多錢，無視呢段戀情嘅意義。
呢場世紀戀，吸引咗百幾位傳媒朋友，點知佢哋苦等，最終留畀佢嘅發言位，得番佢個名牌，同埋一張空櫈，仲有傳媒滿腦子疑問。
郭台銘喺第二日至主動打電話畀傳媒解釋，大條道理話失蹤有因，總括嚟講就係「因為對台、日媒體有三大失望」。
郭台銘非常不滿媒體只係想問今次合作嘅投資金額，太急功近利同短視，佢仲好勞氣話肯定百分之九十九嘅媒體都係黑心想「鴻寶戀」告吹。
其實郭台銘要求都好簡單，佢想行家知道「鴻寶戀」係真心相愛，唔係單純金錢關係，所以行家問親投資金額、公司股價咪觸動郭台銘神經囉。
其實，如果行家問多啲今次合作會唔會促成更有競爭力嘅產品，協助聲寶產業結構轉型之類嘅問題，絲絲肯定郭台銘唔會咁勞氣。