Prof.J一直都有睇住華電福新能源（00816），佢係華電系旗下負責清潔能源業務嘅子公司。作為福建省老大、亦係華東最大嘅水電公司、中國頭五大嘅風電公司，佢嘅業務多元化，涉及水電、火電、風電和核電。
水電係華電福新王牌項目，佢擁有福建省主要河流嘅主導地位同發展，而營運同管理水電項目都有幾十年經驗，同時又發展埋其他能源板塊以分散業務風險。佢有份參與廣州大學城項目開發，當中取得嘅經驗和優勢，令到佢喺分布式能源領域裏面獲得大量優質嘅項目儲備，可供日後開發。
集團上半年繼續發揮佢獨特嘅電源結構「水火互濟、風核並舉」嘅優勢，四個電源板塊互補不足，產生協同效應，提升集團核心競爭力和盈利能力。隨着國家「穩增長」政策相繼出台以及政策效應逐步顯現，預計下半年社會用電量會企穩回升。此外，國策仍然大力支持清潔能源行業發展，擁有多元化組合又再次發揮佢嘅作用，令集團受惠於政府為鼓勵開發唔同清潔能源項目而提供嘅優惠政策。
華電福新中期純利增長1.68倍至7.86億元人民幣，主因水電售電收入增加，分部經營利潤大增2.39倍，資產負債亦大有改善。Prof. J都睇好清潔能源係中國未來嘅大方向，甚至係環球趨勢，股價近日曾一度升回招股價水平，隨時重上水面。繼續追蹤，出發！
香港大學電子金融服務榮譽助理教授 徐燦傑