呢個世界好現實，究竟你需要人多啲，定係人哋需要你多啲，就可以決定到你仲有幾多尊嚴！
好似廠家同銀行嘅關係，就係最佳例證。老友係廠家，佢哋一年前去銀行叩門，只能獲低級職員接見，同佢哋食晏，多數要出埋錢，真係好似冇尊嚴咁，求人哋鬆啲手，借啲錢過難關。
不過時移勢易，佢話銀行依家採取主動，今年內已經有五個銀行高層搵佢，掉轉頭請佢食飯添﹗無他嘅，離岸人民幣業務喺香港發展迅速，銀行界亦明白呢個市場嘅發展潛力巨大，邊個快搶灘，邊個就可做王者，所以近期不斷積極搶客，連高層亦要頻頻出街約見商戶，向佢哋推廣各種人民幣產品。
滙豐銀行曾經估計過，話喺未來五年，人民幣將會成為環球貿易嘅三大結算貨幣之一，前景一片光明。另一方面，港銀開始面對盈利增長放緩嘅問題，需要開拓新嘅收入來源。此消彼長之下，人民幣業務自然成為銀行爭奪嘅戰場，睇嚟佢哋請人都會側重呢啲。
金占士