摩根士丹利前亞洲非執行主席羅奇（Stephen S. Roach），出名係中國大好友，最近好多人形容內地嘅城市為「鬼城」，大好友真係睇唔過眼，叫大家放長雙眼，「鬼城」會變國際大都會。
所謂「鬼城」，係形容內地嘅城市，住房空置高，十足空城，又有空橋、空機場。
羅奇直斥佢哋係「悲觀派」，明顯忽略咗每年農民入城嘅威力，羅奇指每年將會有1,500萬至2,000萬農民走入城市，「鬼城」都即刻變做繁榮嘅大都會啦。羅奇仲話，城市化將有助創造就業機會，勞動收入同消費者購買力亦都會伴隨上升，所以城市化絕對唔係偽增長咁話。