內地家電零售商嘅價格戰雷聲大、雨點小，不過幾間公司揸弗人一向輸人唔輸陣，連日來嘅言語交鋒不斷升級。
蘇寧董事長張近東聲稱如果京東商城嘅業務增速，可以快得過蘇寧易購，佢就將蘇寧送埋畀京東。牙擦言論即時惹起京東商城CEO劉強東把火，喺微博應戰，仲叫張總輸咗一定要記得履行承諾，千祈唔好到時做「縮頭WG（烏龜嘅簡稱）」。
張近東一早就已經話，京東邊可以同蘇寧鬥吖，「大人同細路仔根本就冇得比」。佢仲話，蘇寧易購今年上半年嘅業務增長120%，有投行聲稱京東增速有130%，如果京東嘅增速真係可以快得過蘇寧易購，佢就將蘇寧送畀京東。
劉總真係睇到眼火爆，喺微博正式宣布接受張近東嘅挑戰，仲要張總請定獨立審計師做審計，又話張總係要面嘅人，輸咗唔好抵賴。
為求網友幫佢做見證，劉總承諾到時贏咗，會攞一億股蘇寧電器股票出嚟分畀幫手轉發呢條微博嘅網友。條微博發出五個幾鐘，已經有接近六萬條轉發，連大摩前首席經濟學家王慶都有份湊熱鬧。