股神巴菲特啱啱過咗82歲生日，唔好以為佢會好鋪張咁慶生，好似上一年佢就喺工作中度過，今年就留喺奧馬哈（Omaha），低調咁過咗生日。
巴菲特一直覺得奧馬哈低調嘅生活好啱自己，佢曾經講過，再搵唔到一個比奧馬哈更適合居住嘅地方，樸實氣氛令佢可以堅持自己嘅觀點，思緒變得更清晰，幫到佢做投資決定。
講真，冇奧馬哈就唔會有股神，巴菲特原本無意開展佢嘅投資事業，返到奧馬哈畀幾個家人同朋友勸服先踏出第一步，後來更收購當時係紡織品公司嘅Berkshire Hathaway，發展到今時今日先成為坐擁超過八十間企業嘅集團。
所以奧馬哈可以話係呢位股神嘅「發迹地」，難怪佢話自己同公司都唔會搬走，仲講到明唔准繼承人搬走公司。