近排大市好弱雞，普通股民震騰騰，唯獨是騰訊（00700）嘅股價居然仲創緊新高，咁嘅市況仲唔畀人當搖錢樹咩！聯交所資料披露，騰訊嘅兩位董事劉熾平同埋張志東，近排分別行使認股權或減持套現，條數講緊億億聲，難怪唔少人都話騰訊係打工皇帝嘅搖籃。
劉熾平係出晒名嘅打工皇帝，有人估計過，佢就係舊年交稅最多嘅打工皇帝，要交接近八千萬嘅稅，全賴認股權嘅帶挈。
劉熾平今個禮拜二行使咗80萬股認股權，行使價只係33.05元，即係劉生用咗2,600幾萬蚊認購咗呢批股份，但同尋日騰訊嘅收市價238蚊比較，假設劉生即刻沽咗批貨，就可以大賺億六銀，認真和味！
張志東都唔執輸，今個禮拜二同上個禮拜二，就總共沽咗50萬股，沽貨價都高過240蚊，兩次總共撳錢大概億二個大洋。唔好忘記張志東同馬化騰一樣，都係公司創辦人，騰訊○四年上市價只係得三個七咋，所以億二真係近乎淨袋。
騰訊嘅一班核心人物，幾乎都係IT界嘅打工皇帝，好似張志東咁，歷年減持騰訊套現，可謂賺到盆滿缽滿。至於劉熾平舊年嘅人工，加埋花紅津貼，總共有成二千八百幾萬，仲多過馬化騰，多年嚟又獲贈過千萬股認股權，如果行使晒嘅話，肯定又會變成一個超級打工皇帝啦！
余詩韻