Market Insight：內銀股只宜套戥

前晚美國商務部把第二季經濟增長由1.5%向上修訂到1.7%，二手樓銷售創一○年四月新高，客觀環境美國經濟唔係咁差，即使條頸再硬，都不妨見好就收，唔好死撐周末伯南克真會送禮公布有QE3。

昨日期指結算日，大市低開131點後最多跌過279點，全日低位浮沉反彈乏力，最終恒指跌235點收報19,552點，滬綜指中段曾跌至20,32點改寫三年半低位，中期業績陸續曝光的內銀股，沽壓頗重，國指跌129點收報9,340點，大市成交淡靜主板交投得424億元。

放大圖片

放大圖片

今年，中國股市是全球主要股市表現中的包尾大幡，國企指數五十步笑百步，七月中見9,121點後反彈到10,010點經已無以為繼，現水平再跌2.4%又再破底。古勝仍相信，喺十八大塵埃落定前，做淡勝算依然較高。

個市悶到瞓着，多得收市後，特首梁振英開記者招待會公布新一輪冷卻樓市政策。至於炒家一個唔該，減持地產股鎖定近日升勢的成果，令四大地產股股價跌幅介乎3至5%。

超低利率暫難改變

梁特首公布「五長五短」合共十招措施，推地、改變土地用途，唔係一時三刻有效，始終今日形成經濟同樓市背馳的最大誘因，乃超低利率所致，並非政府所能控制。

最感興趣，仲係即刻可推出應急的單位多寡，包括租轉賣置安心及居屋貨尾，原來得1,000及830個！睇數字，想特首推低個市上車的應該不易，今年一至七月本地物業註冊宗數6.25萬，意味即推供應等於一星期樓市吸納量左右，假如美國將超低息承諾進一步延長，但凡種種措施，看來都係遠水難救近火也。

不良貸款比率仍低

四大內銀僅剩工行（01398）未派成績表，收市後，工行公布半年盈利1,231億元（人民幣‧下同），按年升12.4%，同市場預測1,229億元相差極少，每股盈利0.35元，不派息。上半年工行嘅淨息差為2.48%，與去年同期的2.49%大致持平，貸款質量保持平穩，不良貸款餘額751億元，增加21億元，不良貸款比率0.89%，繼續處於上市後新低，比去年同期下降0.05個百分點。

今時今日，內銀給予分析員之業務指引，透明得太過緊要，當下已極少見到內地銀行業績，會偏離大行預期太多。四大內銀中，建行（00939）比市場估計多3至4%，已算罕見，農行（01288）符預期，中行（03988）亦然，只是淨交易收益、物業公平值變動等較難掌握的變動收益比例稍高，被分析員彈多幾句。

無法想像，全世界經濟一蹶不振，中國增長放緩迹象日益明顯，資金鏈斷層未有因人行逆回購及減存款準備金率等放水政策下得到改善，內銀不良貸款比率居然低得如此交關。

政治任務下，大型銀行貸款組合有相當大比重借給「不能倒閉」的國企，投資市場又把這個風險計入，給內銀股巨大折讓，按工行全年預測盈利2,295億元計，這全球最大市值銀行市盈率得5.2倍，低得可憐。可是，內地經濟見到轉捩點前，要市場把風險溢價剔除也不容易，買內銀短期捱價難免，短期古勝認為沽空估值應被重估的平保（02318），買入內銀進行長短倉套戥，比較可行。

航運股未到撈底時

近日幾隻航運股宣布業績，表現都係差強人意，股價走低係自必然嘅結果。招商局（00144）、中國遠洋（01919）同中海集運（02866）收市股價分別下跌4.6、3.4及10%。

事實上，反映乾貨運價嘅波羅的海乾散貨運價指數（BDI）仍處於於低位，反映行業仍未脫困境。招商局高層亦不諱言，要實現今年集裝箱吞吐量增幅5%嘅目標充滿挑戰，並預計未來半年國際貿易復甦仍存不明朗因素，放緩勢頭可能要多維持一段時間。總而言之，航運股這個冬天真太冷，尚未到撈底嘅時候。

古勝