美股又回升，港股今日勢將繼續單跳，正路成交應該會更低迷，接近月尾，突破機會上升，但上周尾段博極都無功而還，倒不如等待破位才行動，人同此心，交投自然靜。
大軍應該觀望，但去到月尾，末日期權愈來愈值博，不過這種工具時機把握甚難，槓桿超高，一定要用注碼控制風險。舉例上周提過買美股星巴克Put，自己用上周五到期48美元Put出擊，上周五開市初段這個期權升到1美元，收市變零，由賺兩倍到輸清光，是幾個鐘頭的事情，所以一定要睇得好緊。好處是槓桿高達幾十倍，可以小注博大贏，而純賭香港市場的話，一個月也不外緊張幾日而已。
現時要賭單邊，到底買Call抑或買Put，實在好難講。買Put選擇不算難，自己的心水是兩隻已經公布了業績的內險股，平保（02318）以及財險（02328）。前者的業務似有放緩迹象，一向市場評價極高，出現小瑕疵，有權出現較大的調整。至於後者業績後勁升，可是股價開始無以為繼，市場應該對前景有保留，亦是可以反覆回落。兩者信心不算太大，沒有短期催化劑，但一旦市況轉差，則可望跌得比大市勁。
買CaII選擇反而不易，美股勁A股弱，而在香港跟得住美股升的股票買少見少，A股則恍如無底深潭，中資股更加難言信心。本地地產股是最正路選擇，始終地產市道依然紅火，實物資產最受惠QE3憧憬，上周四曾經嘗試突破，超碼證明有人垂青，不過再博的話，自己會以新地（00016）為主。
今次買齊兩邊，潛在回報未必太高，倒不如因應自己心水賭一邊，注碼則可以細一點，正如賭馬買W唔補P一樣。
‧因應心水買內險Put或本地地產Cal
豐盛金融資產管理董事 黃國英（作者為註冊持牌人士，基金持有平保Put及財險Put）