孖妹S檔案：民企「股惑」教你拆解

莫：海通國際資產管理投資董事 莫偉民

高妹：聽講民企嘅瞞騙招數既「出位」又「認真」，試過有基金經理實地考察民企時，發現其廠房、機器、員工都係借返嚟！嘩，真係拍戲咁拍！

文志豪

放大圖片

莫：其實上市公司帳目混淆不清，慣常招數都係從銷售量、應收帳及現金流等方面入手。而拆解方法就是仔細研究財務數據真確性、將數據與同業進行比對、查證銷售記錄及單據、直接詢問管理層、到現場實地考察等。但老實講，如果這些民企是存心欺騙，有時候連基金經理都避唔到。

缺乏面對逆市經驗

高妹：連基金經理都呃到，可見民企「地雷」難防！

莫：作為基金經理，如果我對民企帳目有所懷疑，寧願唔買算數！當然，如果大家見到某上市公司管理層輪住「跳船」，或者核數師突然宣布辭職，咁就一定要小心。散戶可以睇年報去做投資功課，但緊記要對當中財務數字抱懷疑態度，特別是流動資金比率、股本回報率、債務比率。

高妹： 股神巴菲特講過：「水退時，就知道邊個在裸泳！」最慘現時民企呢趟「渾水」有排都未退完呢！

　莫： 民企股不同港股，前者大多數上市歷史較短，投資者對其往績參考欠奉，加上企業未正式經歷過股市循環，令管理層對於逆市、逆境均缺乏應付經驗。再者，民企老闆傾向做事進取，經濟大氣候良好時，進取當然無問題，但如今環境就要再調節營運策略。不過，民企質素有壞亦有好，水退時或者就是散戶撈到好股嘅時機。

文：國泰君安資產管理（亞洲）投資分析員 文志豪

彩兒：民企帳目問題通常都係想「谷大」或「谷細」盈利，視乎民企老闆想避巨額稅，定係想操控股價升跌幅喇！

文：對於企業所提供嘅數據，作為分析員必須懂得去懷疑數字嘅真確性。某些行業透明度高，可以利用官方數據如統計局、海關等查證，再者就係同行業績，特別是競爭對手嘅業績，通過呢個環節關鍵去了解行業情況，以「比較」方法去發掘出問題。

在研究民企時，公司背景以至公司董事局、管理層人物背景均十分重要，更要留意公司董事局成員有否出現交叉委任，或某家族成員及關連人士過多情況，因這些現象都會削弱公司管治嘅可信度。而大股東嘅角色，會否導致佢有操作公司營運、資金用途等過大權力亦值得注意。

數據「too good」要核證

彩兒：話明民企嘛，董事局或者管理層用番「自己人」都正常呀！但有人話，民企老闆多數有「皇帝病」，有佢講無人講。言行彰顯人格，你又會點樣觀察佢哋呢？

　文： 工作需要令我經常接觸不少行業嘅民企老闆，但我話你知，有「皇帝病」嘅老闆是乾脆不見人的。而我在拜訪他們或管理層時，通常都準備好多問題，如針對公司營運及往績、對經營前景判斷、行業觀點、預見政策風險等應變方法。由於要知道管理層嘅誠信和營運能力，所以我會先收集資訊建立一個預期予企業，而實質營運成果與預期嘅差距，就是用來判斷企業整體質素。

彩兒：民企帳目混淆視聽的方法層出不窮，你話點樣先可以識穿？

文：要對企業財務或營運提出疑點，利用外來數據做對比分析相當重要。舉例當某公司業績出現too good to be ture嘅情況，大家不妨先繼續尋求箇中利好原因，並提出疑問：「點解呢間公司做得比同業更好？」投資者要盡所有能力，提高判斷企業優劣嘅可信性，當然要判定細節是相當困難的。

核數師：兩個情況預示爆煲

林：立信德豪會計師事務所董事 林兆豐

高妹：民企「地雷」防不勝防，就連歐洲股神安波頓（Anthony Bolton）都多次踩中，搞到其管理嘅富達中國特殊情況基金去年錄得慘蝕！有魚缸線人向孖妹報料，波頓為免噩夢再現，已經請咗私家偵探去大搜查民企，不過呢個只係傳聞嚟啫。

林：「會計師樓在正式接生意之前，一定會做Due Diligence（盡職審查），對企業客戶進行一切資料分析及調查，如行業狀況、企業聲譽及歷史、管理層架構等等，以確保企業有充足誠信，減低其將來做假之可能性。」當散戶見以下呢兩個情況出現，就要打醒十二分精神添呀！

情況一：年報出現「有保留意見」聲明

林：「年報裏會有份『獨立核數師報告』，由核數師撰寫，如果上市企業帳目無問題，核數師會寫上『真實而公平』，證明其營運業績、盈利、現金流量等資料正確；相反則會寫上『有保留意見』，雖然此聲明並非係指其帳目失實，但可能係指有關財務數字對企業存在不確定性影響，或對企業的持續經營能力受質疑等，致令核數師未能充分表達目前該企業情況。」

情況二：會計師事務所主動辭任

林：「之前提過，會計師樓喺接納企業客戶之前，一定會做Due Diligence，證明企業擁有相當程度嘅道德操守。因此，如果核數師決定主動向其上市企業提出辭任，當中必定存在充足理由，如帳目可信性出現重大問題、核數師與管理層出現意見分歧等原因，總之辭任絕不會是個輕率決定。」

部分民企帳目問題

•財務數據不清

•銀行文件及相關帳單資料含糊

•供應商、客戶、員工，甚至固定資產資料存疑

•誇大銷售量，提升企業營運能力及盈利回報

高妹、彩兒

若有料報畀高妹同彩兒或有嘢問，可電郵money.biz@opg.com.hk