所謂「不排除再推出首次置業貸款和夾心階層住屋計劃」，就即係未推出。由意念至到推行，都需要時間籌備，更何況政府目前都夠多嘢煩，睇怕除咗用白表政策之外，暫時都只可以乾眼睇樓市。
香港土地資源係咁多就咁多，講咁多都冇用，最重要都係睇供應。賣一塊地皮，就真係少一塊，貪曾年代又冇做過規劃，要喺咁短期間扭轉局面，談何容易？所以樓市仍然係升不停。同埋，就算真係政府咬實牙根要同樓市死過，都要由庫房撥資源，計埋人工同興建時間，冇番三五七年，大家都係唔使諗住增加供應。喺咁嘅情況下，樓市點可能大跌？
再加上，政府批地過程，經過咁多年已經僵化；無論起幾多個單位，程序由搵地、改規劃、諮詢、重建等等，都要經過一大堆過程，拎一大堆批文，又係等到大家瞌眼瞓。計落計落，當然又係三五七年。
事實上，發展商審慎還審慎，當然都會話樓市係個好嘅投資；任何情況都同一口徑，大家其實唔使當係一個分析。事實真相係，短期利率唔會回升，市民大眾供樓成本唔重；由金融政策分析，大家可以預期去到二○一四年供樓成本都唔會點上升。經過聯儲局近期議息，同埋樓價跌唔落，亦令到好多觀望嘅資金開始回復信心，重新回流。加上居屋新政刺激下，各區都出現反價封盤。
在上述種種的因素夾雜之下，相信樓市只會有get set go。
香港大學電子金融服務榮譽助理教授 徐燦傑