里昂證券亞太區投資者論壇愛「搞噱頭」，往年已試過請啲名人、明星、政客做嘉賓。絲絲聽講佢哋今年就諗住邀請前重量級世界拳王泰臣（Mike Tyson）做嘉賓，唔知泰臣會唔會帶埋佢隻「寵物虎」出席呢？
泰臣係拳擊史上最年輕重量級拳王，20歲就攞咗條「金腰帶」，巔峰時一拳有成三百幾磅，真係「一錘打甩你個頭」嗰隻。但係佢後來沉迷酒色，喺九二年因強姦罪名成立而入獄；九七年諗住「東山再起」，點知就喺拳賽中「咬甩」對手荷李菲特（Evander Holyfields）隻耳，令其一度聲名狼藉。
近年泰臣轉型做「諧星」，憑佢喺《醉爆伴郎團》嘅演出再「一夜成名」，最近仲喺紐約百老匯做完十二場「棟篤笑」添。里昂就話泰臣今次會分享佢嘅拳擊、牢獄、信仰同演戲方面嘅經歷，絲絲心諗，泰臣唔知會唔會帶埋佢喺戲入面嗰隻「寵物虎」出席呢？
絲絲過去幾年都有去里昂嘅投資論壇，最有印象嘅嘉賓包括當時嘅美國副總統候選人佩琳、荷里活型男佐治古尼、喺電影《華爾街》入面飾演華爾街大鱷Gordon Gekko嘅米高德格拉斯。可惜米高之後證實患癌取消來港，大會改為邀請《教父》金像導演哥普拉出席。為免令出席嘅銀行家同投資者失望，佢哋安排咗《華爾街之金融大鱷》首映禮招呼大家。
余詩韻