美國兩間被譽為經濟領袖人物搖籃嘅大學，哥倫比亞大學、耶魯大學揸住唔少現金，佢哋一早已經攞咗QFII資格，名正言順投資大陸嘅A股。原來佢哋嘅投資方針好唔同，哥大鍾情於投機概念，耶魯就偏愛價值投資，係咪估佢哋唔到呢！
培養出股神巴菲特嘅哥倫比亞大學，投資年期比較短，但勝在有一隊出眾嘅團隊，喺15位專業投資人士入面，一半係校董，另一半就係校友，而且全球仲有30至40間基金管理公司同哥大基金合作。
唔知係咪因為有咁多人打理，所以經手嘅股票超過40隻，大部分仲未揸夠半年就放咗，係典型嘅中短線投資style。哥大最愛重組股，不過有人認為佢哋唔夠耐性，淨係跟風聽雨，似足一隻迷途羔羊，佢哋喺○八年介入攀鋼釩鈦就係其中一個例子。哥大除咗對短炒重組股有興趣之外，亦熱衷參與一啲題材股嘅炒作，有時仲會踩中業績地雷。
羅傑斯嘅母校耶魯大學，投資經驗就比哥大多兩年，作風都比哥大專一得多，操作手法好有羅傑斯嘅影子，都係順應低買高沽嘅原則，由○六年到依家都只係操作過10隻股票，中長期持股為主，睇佢喺3年間不停操作美的電器就會知道。