鑽石同黃金你揀邊樣？好多女士特別鍾情鑽石，問十個，有九個都會答鑽石。
有「星級分析員」之稱嘅Look's Asset Management董事總經理兼投資總監陸東（Andrew），笑住話自己嘅意見，女士可能唔啱聽，皆因佢強烈建議揀黃金，就算老婆問到都係咁答。
黃金嘅避險角色一直冇變，特別係QE3仲隨時有可能彈出，早幾日金融大鱷索羅斯盡顯「撈底」本色，低位大手增持黃金ETF，絲絲都有跟風買啲金粒仔，保住吓啲資產。其實Andrew喺七月尾，已經叫絲絲，喺金價每安士1,500美元時收集黃金，依家黃金已升穿1,600美元。
雖然黃金可以保值，不過女士們梗係愛鑽石多過愛黃金啦！Andrew話：「女士們實唔鍾意聽，不過世界上最多供應量嘅就係鑽石，你去掘就有；相反黃金先係真正貴金屬，產量有限，可以保值。」佢仲自爆，佢將呢個事實講畀老婆聽時，卻換來對方一句：「你唔想買畀我啫！」
余詩韻