絲絲講場：家族酒店星上市 黃氏兄弟又No.1
有「大好友」之稱嘅信和置業（00083）主席黃志祥，喺香港地產市場好活躍，原來佢家族喺新加坡嗰邊，都有動作。
籌41億今年最大IPO
黃氏嘅家族旗艦遠東機構，最近就將旗下七大酒店同四個服務式住宅，組成Far East Hospitality Trust，以信託形式分拆喺新加坡上市。呢單係新加坡今年最大嘅新股集資，唔單止為當地金融市場增添不少生氣，黃氏兄弟「身家」料亦水漲船高！
遠東機構係新加坡最大私人物業發展商，聽聞呢個分拆活動，市場反應好好，並以上限定價，集資5.26億美元（約41億港元）。不過，即使唔計今次分拆，黃志祥同佢細佬黃志達今年都蟬聯福布斯新加坡首富，估計「身家」合共高達92億美元（約717億港元）。
安本友邦入股做策投
根據佢哋家族嘅分工，黃志祥專注香港，黃志達就睇實新加坡，所以今次分拆，黃志達應該「孭重飛」，絲絲聽聞分拆嘅酒店信託，吸引唔少投資者參與，安本資產同友邦（01299）仲做埋基礎股東（Cornerstone Investors）。
近年新加坡搞旅遊業確有一手，尤其環球影城每年吸引唔少遊客，據新加坡旅遊局嘅資料，單係今年一至五月，新加坡嘅旅客已經升咗一成二，當地酒店五月嘅入住率更高達86%，何況黃氏家族持有嘅酒店全部都喺「超靚」地段。睇嚟香港特區政府都要為本港旅遊業搞多啲噱頭，唔係就會畀新加坡搶晒啲客仔喇！
余詩韻