有粉絲電郵我話好耐之前撐嘅康宏理財（01019）點樣「伴我啟航」，點解依家小虎隊不見了。Prof. J已經畀咗我嘅「蝙蝠電話」畀佢，一打即通，無問題。當日康宏上市，Prof. J都話因為識主席王，加上佢又人稱金融版「鋼鐵俠」，又見佢平時「東奔西走為康宏」，咁又加上康宏確係一個由時間啟動嘅財富管理公司，諗住一個企業管理層好緊要，起碼佢都叫做「有心有力」，頭段股價表現算係咁啦！不過，股海世界點可以一成不變。
一○年七月上市，一一年二月發盈喜，八月再發盈喜，中期又報佳績29%，今年三月公布上年業績就少賺18%，早幾日發中期盈警，似乎大勢不可違。發盈警原因，原來畀班「銷售大帝」佣金賺多咗。不過，我又諗，畀錢多咗，原因都係「有錢駛得sales交數」，亦都印證金融機構嘅艱苦歲月。好彩保監話要班獨立理財顧問（學名係保險經紀）披露佣金存有變數，一去到呢個位，又可能畀人話唔透明，又係一個三年又三年都無乜結果嘅討論！
有粉絲話康宏又向大股東買內地業務，無嘢搵嘢搞。我就覺得要將中國業務放入上市公司，好多嘢要「慢慢執」。康宏最後點，梗係要問主席王啦。以主席王今時今日地位，點會懶懶閒唔做嘢，咁多人關心隻船，繼續追蹤，出發！
香港大學電子金融服務榮譽助理教授 徐燦傑