幾時都話現代職場女性又靚又叻，簡直係「巾幗不讓鬚眉」。絲絲絕對冇偏幫一班姐妹，NerdWallet一項研究發現，喺舊年嘅財政年度，美國500大企業裏面，雖然只係得19位女性CEO，比例連一成都冇，但係佢哋嘅薪酬就比好多男性CEO要高。
研究指出，呢19位女性CEO嘅薪酬中位數係1,110萬美元，而其他男性CEO嘅薪酬中位數就係980萬美元。絲絲計一計數，原來女性CEO嘅薪酬比男性高出13%，當中人工最高嘅女性CEO就係卡夫食品嘅Irene Rosenfeld。佢喺○六年加入卡夫，研究就話佢嘅薪酬大約有2,200萬美元，位列榜首。
不過呢個研究係上年做嘅，所以前任雅虎CEO Carol Bartz都榜上有名，以年薪約1,600萬美元排第五位，佢個位依家就由Marissa Mayer接任，係咪都有相同嘅待遇呢？絲絲就知道，如果呢位CEO可以做好自己份工，喺雅虎留任五年，佢嘅底薪就可以加到2,500萬美元，分分鐘仲多過榜首嘅Irene Rosenfeld啊！可能雅虎唔想成日換CEO，所以先出動到銀彈攻勢想留住人才啦。